И мар понна нимдэ туннэ гинэ тодӥ

   Берпуметӥ курсъёсын но технической университетын нуо физвоспитание. Кинлэн кызьы,  милям со озьы нимаське. Ветлӥськом тренажёркае. Кин кылльыса луэ, кин крезьгур кылзэ, кин телефонэн вераське. Тренеръёс оскалтыса уг ветло. Адямиос бадӟымесь ини татын, малпаськыса, юанъёслы гинэ валэктон сёто.

   Таяз аре академической группаысьтым мон огнам ветлӥсько. Мукетъёсыз аэробикае, ЛФК группаосы пыремын.  Азьло пырылӥ раздевалкае, дӥсялляй спортивной дӥсьме но мынылӥ гантелиос доры. Акыльтылӥз кылзыны кар нылашкаослэсь клубе потам сярысь веросъёссэс, пияшъёссылэсь чебер мугоръёс сярысь выжыкылъёссэс. 

   Одӥг нуналэ тодматски  нылашен. Тодматски... Зэмзэ вераса, ми огшоры кутским вераськыны. Сомында толэзь ӵоже, ӵошен мугормес утялтыса, мон даже нимзэ ӧй тоды. "Тодматскеммы" бере, кулэ дыръя, со шыпыт вазиськылӥз мыным, "Ксюша". А мон ӧй тодылы нимзэ. Хоть бӧрды, хоть серекъя.

   Тренажёркаысь нылъёсын мон кылме пиньёсы сьӧрын ке но возисько, соос монэ контактын "эшъёссы" пӧлы но пыртизы ни. Малы? Уг тодиськы.

   Нимтэм нылаш тоже быдэстэ дышетсконзэ. Кошке Чехие, дышетсконзэ азьланьтыны(пимурт эшеныз). Ми вераськылим соин кылбуръёсы сярысь, трамвайёсыз сярысь, куазь сярысь. Озьы ке но, ми ноку ӧм вераськылэ соин пичи воргоронъёс сярысь. Вордиськем нуналаз мон солы яратоно Киндер шоколадэз ваи вал. 

  Солэсь мон трослы золгес "ужасько". Куддыръя, серекъяса, "сэнсей" монэ нималля. Серем.    Туннэ, кылиськонниын, паймим накачанной пыдъёсылы. "Остэ, тон ку вуид"- шуиз мыным но мыня ачиз. 

  Тренажёркаысь потыса, со азьлань шонтӥз. Вазиськоно вал но, уг тодӥськы, кызьы. Нылъёс шуо вал кызьы ке... "Арина", "Алла", "Анна", "Антонина"...

Шыпыт верай:

-Алина...

Берытскиз!

-Малпай, кошкод ни шуыса.

- Ма карыса кошком, сэнсейме витисько.

-Зэм ик!

-Кылзы, малпай тонэ контактысь шедьтыны. Таки уг вуиськы.

-Кулэ ӧвӧл контактын. Вай телефон номердэ. Озьы умойгес. Чехиысь бертыса, жингыртод. Сэнсеед тонэ пумиталоз.

Серекъям.

-Алина. А вот кылзы.

Нылаш но пияш. Туж ярато ог-огзэс. Нылаш аспӧртэм, йыртэм, шузигес-а мар-а. Пияш ӟон-ӟон, воргорон, "шуиз-лэсьтӥз". Нылаш отын но, татын но чиля. Пияшез шумпотэ. Озьы ке но, нылаш лэсьтэмзэ уг вала кадь.  Оломар но давортэ. Кутске но 12 час ӝыт потэ мурт пияш доры, свиданиосы часлы но бер вуэ, песянаеныз но тодматэмез уг поты пияшсэ.  Пияшез часэ уйин жингыртэ но, нылашез али ке но гуртын ӧвӧл на. Озьы ке но соос ярато ог-огзэс., кыкназы ик.
- Эм... Нылаш интыын кылзысал эшъёссэ. Эшъёсыз интыын ӟон-ӟон валэктысал ситуациез. Палэнысен.
-А пияш интыын?
-Куштысал, дыр.

-И мар понна нимдэ туннэ гинэ тодӥ?

Мон тӥледыз туж зол.

Мон тиледыз

Туж зол…

Зэмзэ.
Мыным
оскиськоды-а?

Та  сьӧд

Чебермамтэ

Камзол

Гинэ

адӟиськоды-а?

Оло

уд тодӥське,

Кызьы

Тулыс

Быро юсьёс?

Кызьы,

Шӧдтэк шорысь,

Кесько

Кужмо

Чылкыт бурдъёс?

Оло

Уд мӧзмиське,

Бер ӝыт

Адями

Шунытлэсь?

Оло

Уд шӧдӥське,

Ненег

Пӧям

Та тулыслэсь?

Эн оске,

Уй понна

Нош ик

Зол зор кадь,

Бӧрдӥсько
шуыса.

Мон тӥледыз

Зэмзэ

Туж зол

Укно вадьсын

Витисько,

Чакласа.

Кужмысь
вирсэр пильыскытчозь

Монэ шунтэ кагаз.

Та уй вадьсын

Лампа улын

Солы мӧзмыт огназ.