воскресенье, 29 декабря 2013 г.

Мон басьтылӥ дэремдэ

-Мон басьтылӥ дэремдэ. Тон сётӥд мыным умой, дуно материаллэсь вурем дэрем, нош мон сое кеси. Мон уг быгат сётыны тыныд сое, мае басьтӥ. Соин ик, ойдо мон басьто сое тынэсьтыд, уксёен, нош тон вурод выльзэ. Оло ойдо басьтом сыӵе ик басма но вуром таӵезэ кадь ик.
-Тон, котьку кадь ик, ваньмыз понна сюлмаськиськод, мусое. Кесид но кесид, кинэн уг луы. Номыр кулэ ӧвӧл. Кузьмасько.
-Зэм ик? Тон зэм ик  вылам вождэ уд потты?Зэм?
-Тон самой аспӧртэм адями, кудзэ мон тодӥсько.

 Та улонын ваньмыз понна кулэ тырыны. Ческыт пуньы чечы понна стакан утыр дёготь сиыны кулэ луэ.
 Адямиос воштисько, вошто улон интыоссэс, кузпалъёссэс, духиоссэс. Улон уг сыл одиг интыын. Кыл, кудиз верамын вал туннэ чукна чуказе жыт воксё мукет малпан но мукет кужым нуоз ни ас вылаз. Мон малпалляй туннэ ке тазьы, значит котькулы, вань улонлы. Эшъяськон- так сюлэм жугиськытчозь, яратон- так синъёс ворсатчозь. Эх, пичи шузи Ксюшик, нуналскын ческыт парной йол но чырса ук, холодильнике ке од пон.

 Синдром отличницы сыче пыр-поч пыриз пушкам, что мон курисько одиг адямилэсь сомындаез, мае уз лэсьтэ вань тодмо адямиосы котырысьтым одиг дыре. Малы ке, мед адями валалоз мае ке, солы кулэ ыштыны самой дунозэ. Куддыръя та валан лыктэ нунал, арня куспын, куддыръя ар ортчемъя, ваньзэ ыштыку.

  Вынылэн пичи жокез вылын туннэ бадзым букваосын гожтэмзэ шедьти "28 декабря. Пиезжает Ксюша. У нас будет празник!".

 Яратиськоды ке, яратэ. Шыпыт, вератэк. Сюлэмын. Ноку эн куре тиледыз мед яратозы шуыса, мед яратозы зол, утёзы сюлмысь, нуныятозы, пичи пиналэз сямен. Ноку эн черекъялэ яратэмды сярысь. Яратон-со чус маке.
 Яратэ али.  Дэрем котькуд минутэ быгатэ кеськыны.
 Вуоно выль арен.




суббота, 21 декабря 2013 г.

Воксё экономить карыны уг быгатӥськы

   Воксё экономить карыны уг быгатӥськы. Вань уксё- басьтӥсько самой умойзэ. Уксё ӧвӧлтэм дыръя пукисько дорам но юисько сакыртэк вож чай. Оло со умойтэм, но логикая, умой товар сылэ дуно, малы ке шуоно со умойгес. Дунтэм товар солы  маин ке но уступать каре.Конечно, луыло дыръёс, ку вузась ачиз ик шузиеныз пуктэ улӥгес дун.
   Будэ дун аракылы, сиён-юонлы, коркаослы, чылкыт вулы. Ӝужыт высоткаос дорын пичи машинаос, губиос кадь, будо. Улон ачиз дуноме. Твороген сочень, кудӥз вылын мон ас дыръяз кӧёми 60 килограммозь(Остэ...), 12 манетысен 18 манетозь вуиз 4 ар куспын. Даже синмез буян тушь. Табере 700 манетэн басьтӥ. Синъёсы, пе, туж чувствительноесь, таиз гинэ тупа. Ну, мед.

   Будысалзы ке дунъёс кылъёслы, кылвозёнъёслы, "валесъёслы".
   Монэ котьку паймытылӥз, кыӵе ӝог али гинэ тодматскем нылэн пиен верало ни ог-огзылы яратон, улон бырытозяз ик ог-огзэс чаклан но оскон сярысь кылъёс. Шуныт сообщениос контактын, телефон пыр гожтэм смс-каос: "писэе", "лудкече", "шундые". Но со ог-огзэс арня яке арня но одӥг нунал тодэмъя. Ну со умой дыръя. Кыкетӥ арняяз пумисько яке нылашлэн, яке пияшлэн дораз. Ну и валамон, маин со ваньмыз быре. Одӥг сценарий. Одӥг ужпум. Арысь аре, нуналысь нуналэ. Только ваньмыз дуноме дыръя, таиз понна дун усе но усе.
   40 арескозь одӥг карын улыса, магазинэ потыса, адямиос ог 30 штука "писэйёссэс" адӟыса вуо. Серем.
   А вуэ ке ваньмыз пинал ваён пуме? Мар карыны? Ведь со вал шудон форма гинэ. "Лудкечьёс, шундыос". Пинал вайыса, быдэс улонзэс аслыз ик вожзэс поттыса луо.

  Алигес клубе потыса(туж курысал Инмарез, та уй интыосы потаме берпуметӥез мед луоз вал шуыса) эктон питыранэ шедим. Нылъёс вакчи юбкаосын, откровенной дэремъёсын, пиос вылэ тубыса ик, экто. Ну да, со же клуб, малпай. Эше монэ кутӥз но, тон коть, пе, мыня вал-а мар-а, ато сылӥськод "я не такая, я жду трамвая". А мон солы, "али гинэ-а валад мон мукет шуыса" шуи но мыняны кутски.

 
   Да. Азьло туж аспӧртэмлыко потылӥз, пияше туж шер яратэмзэ вера шуыса. Тодэмъя,одӥг пол гинэ вераз вал. Юай но, серекъяз гинэ. Мон, пе, тонэ яратӥсько; ярато туннэ ӝыт, ӵуказе ӵук, арня ортчыса, ар, дас ар, быдэс улон куспын, сое котькуд нунал вераны кулэ ӧвол. Гордэктӥ но, "а мон тонэ всё равно яратӥсько" шуи. Ӟыгыртӥз зол.

   Эх, шуныт тодам ваемъёс.

   Уг быгатиськы ик мон экономить карыны.



 



понедельник, 16 декабря 2013 г.

Мон ӧй синмаськы

Жингыртэм.  "Кызь минутскын вуо. Султы, изись чеберай."
"Неужели ӵук? Ага..."
 Кыкети арзэ малпасько ини воштыны вань улон графикме, али ке но тазьы ик выдӥсько куинь-ньыль часэ. Яке гожъяськисько, яке лыдъяськисько.
Ческыт уйвӧтъёс куспын толон ӝыт эшеным вераськеммес вунэтӥськем вал ни.
Зор канализационной системаосын юрттыны кариськыса, табере со ӵемысь гожъя "Мыныны нокытчы кулэ ӧвӧл-а?". Лыктэ корка доры но вите. Ну тумошо ук!
Ярасько, дыр, мон солы. Но сыӵе форма пиосты ми ортчылӥм ни. Профессиональной сленг кутыса, таӵе экземплярчикъёсты  "бускель колодец доры" келяны кулэ..
Уг яратӥськы эмъяськон интыосты. Выль визит- выль висён. Хоть али люстра дӥне кут но ошиськы. Озьы ке но пуксим машинае но мынӥм. Со золгес лэзиз "Cплин" гур, эскериз умой-а донгиськем ременез, учкиз вылам но сюрес вылын "эктыны" кутскиз.  То паллян, то бур пала. Кышкатыны монэ малпа кадь. А мон уг кышкаськы. "Калленгес, В." шуисько но, укное учкисько. Мӧзмыса йырзэ нюкыртэ но вӧл-вӧл сюрес вылтӥ мыныны кутске. Мыняса, "Озьы ик кулэ", шуисько.
Лыктӥськом гуртэ. "Пумиськытозь." "Ага, тау бадӟым. Умой берты". Ӧсме ворсасько но, бызьыса подъезд доры мынӥсько. Нош со шумпотыса учке. 

Толло скважинаосты лыдяськонме дышетӥселы возьматыса, вуоно парае бере кыли. Гардероб дорын кык диванэ кузьда черод сылэ вал. Донгасько, азьпала пото. Нош мон шыпыт сылӥсько. "Ну, адямиос же ми. Кӧня ке гажан ог-огмылы кулэ ук", бультыртыса, киям пичи стальной 13 нумеро питыран берыкъясько. Я, берпалан но донгискыны кутскизы кадь. Мугоры шуныт ыжгон свитерез шӧдиз. Матэгес но матэгес. Ну я, мынам чиданэлэн но пумыз луыны кулэ. Берытскисько но, сьӧрам пияш сылэ. Ну, пияш шуыны  ум ни быгатэ. Воргорон, дыр. Бадӟым мугоро, сьӧд йырсиё, лыз синмо... Одӥг кылын, солэн вань ваньмыз, мар понна пичи Ксюши солы синмаськысал. 
Я, ваньмыз, мар потэ, только эн синмаськы, шуисько вал аслым.

Вуи ик парае. Бере кылемме  умой пумитазы. Ну, Евсеева же,озьы ик кулэ кадь, мынязы гинэ. А сюлэмы дыр! куалекъя. Медам гинэ шедь пумитам со пияш, ну туннэ коть, малпасько вал.
Столовое мыныса, сое ик пумитай. Бускель ӝӧк сьӧры пуксьыса, кошкон дорозям ик синъёсы азьын ворекъяз.

Наверное, мон ӧй синмаськы. Конечно, мон ӧй синмаськы. И воксё мон ӧй на вунэт сюрс ар талэсь азьло ортчем "яратонме". 
Но малы ке та шудо ӵукез мон пумитасько укно дорын, вань лыдъяськонъёсме палэнтыса,  шумпотыса учкисько ӝуась уй фонарьёс шоры, юисько вож чаез но малпасько, "Кызьы меда солэн нимыз?..."

воскресенье, 15 декабря 2013 г.

Оло, шедьтод ик

Та тол кыӵе ке аспӧртэмлыко. Йоно тӧлъёс оз на жугиське бадзым пластик укноосам, пиналъёс ӧз на дисялэ чебермам гынсапегъёсты, нош мон, пыдъёсме диван вылэ ӝутыса, кыкети нунал пукисько гуртын но лыдӟисько аэрируемой песколовкаос сярысь.
Уг шунты номыр: вож чай, водопровод, уй лампа, анай жингыртэмъёс. Уг шунто ыжгон носкиос но бадӟым вуж плед. Тодымтэ муртлэн смс-каосыз но, кудъёсыз мон лыдӟисько ини куинети оло ньылети толэзьскын, уг шунто.
Тодам ваисько пичи дырме. Нырысети куинь арме мон анай-атаеным кӧлалляй,  бадӟым валес вылын. Бур палан-анай, паллян палан-атай, ныр дорозям ик кыскемын бадзым ыжгон одеял. Вожалляй мон. Анайме-атаелы, атайме-анаелы. Соин ик, вань шуг-секытъёсты палэнтыса, я одигез доры берытскыса, я мукетыз доры, ӵукъёсты пумиталляй.
Нош ик берыктысал ваньзэ.(Серекъясько)
Монэ шунтысал гур. Бадзым тодьы гур. Вань тол ӝытъёсы ми сюдылим сое чебер пуосын, нош со шунтылиз милемыз вуоно ӝытозь. Ӵемысь чындылиз. Соку вань коркамы сьӧд ӵынэн шокалляз.
Одиг пол монэ песянае келяз бускельёсмы доры. Вай, пе, ӵынкуды, отчы вань ӵынэз люкалом но капчи, умой луоз, коркамы югытскоз. Эх, бызьыса мынӥ бускель коркае. Ӧвол, шуизы, ӵынкудымы. Мукет коркае, пе, сётӥм ни. Йырме мыкыртыса, бертӥ. Песянае мыняса пумитаз но, паймыса юаз, ӧз-а, пе, сётэ. Дак мурт киын, пый. Кема ӧз ни вочкы, мачкиз.
 -Ӧвӧл ӵынкудыос, мусое. Малпам арбери со. Вань пиналъёс но тодисьтэмъём солы оско. Но нокин ноку ӧз на адӟы сое.
- Но со же кинэн ке малпамын, значит, вань.
- Утчалод ке, утча. Оло, шедьтод ик.